خبرونه

د پروان پوهنتون په باره کی

د پروان  پوهنتون په باره کی

په پروان پوهنتون کې د اداري ودانۍ بنسټ ډبره، لوړو زده کړو وزیرې له خوا کیښودل شوه

په پروان پوهنتون کې د ۱۴ میلیونه درې سوه زرو افغانیو په ارزښت د اداري ودانۍ د بنسټ ډبره، د لوړو زده کړو وزیرې له خوا کېښودل شوه.

لوړو زده کړو وزیرې پوهنوال دوکتور فریدې مومند پروان پوهنتون تحصیلي وضعیت د ارزونې په موخه پروان ولایت ته سفر وکړ، د پروان پوهنتون پرمختګونه او نیمګړتیاوې یې وڅارلې او په دغه پوهنتون کې یې د یوې ودانۍ د جوړولو چارې د ډبرې په کېښودلو سره پیل کړې.

لوړو زده کړو وزیرې لومړی د یاد ولایت له والي، ولسي جرګې ځینو استازو، ولایتي شورا غړو او د دغه ولایت له لوړو پوړو چارواکو سره لیدنه وکړه او په یاد ولایت کې یې د تحصیلي وضعیت د لا ښوالي او د لوړو زده کړو خصوصي سکتور په پیاوړتیا خبرې وکړې.

په دغه لیدنه کې د پروان والي انجنیر محمد عاصم عاصم، پروان ولایت تحصیلي وضعیت د څارنې په موخه د لوړو زده کړو وزیرې له ورتګ څخه مننه وکړه او د پوهنتون د معیاري کولو او د نوموړي پوهنتون د ودې په اړه یې خپل نظریات لوړو زده کړو وزیرې سره شریک کړل او په نوموړي ولایت کې یې د لوړو زده کړو وزارت د پروګرامونو په پلي کولو کې د همکارۍ ډاډ ورکړ.

ورپسې د ولسي جرګې غړي محمد الماس زاهد په یاد ولایت کې د تحصیلي وضعیت د ښه والي په اړه خبرې وکړې او خپل نظریات او وړاندیزونه یې لوړو زده کړو وزیرې سره شریک کړل.

وروسته د لوړو زده کړو وزیره په داسې حال کې چې د پروان ولایت والي، ولسې جرګې او ولایتي شورا غړو یې ملتیا کوله، پروان پوهنتون ته ورغلل او د یاد پوهنتون له بېلابېلو برخو څخه یې لیدنه وکړه.

نوموړې د محصلانو له درسي بهیر څخه د لیدنې پر مهال د محصلان ستونزې چې په کې د لیلیې، پاکو اوبو، کتابتون او انټرنیټي اسانتیاوو پراختیا، لابراتوارونو جوړول، درسي ټولګیو زیاتوالی او نورې غوښتنې شاملې وې، واوریدې او د حل په موخه یې اړوندو چارواکو ته لازمې لار ښوونې وکړې.

لوړو زده کړو وزیرې همدارنګه د نوموړي پوهنتون له استادانو سره په یوه ځانګړې ناسته کې د استادانو وړاندیزونه واوریدل او ژمنه یې ورسره وکړه چې لوړو زده کړو وزارت به د توان تر حده د هغوي غوښتنو ته مناسب ځواب ووایي.

همدارنګه د یاد پوهنتون د اداري ودانۍ د بنسټ ډبره په داسې حال کې چې د یاد ولایت والي او نور چارواکي هم حاضر ول د لوړو زده کړو وزیرې له خوا کښودل شوه.

دغه ودانۍ په دوه پوړه کې چې ۲۱ اداري خونې لري د شپږو میاشتو په موده کې د لوړو زده کړو وزارت له پراختیایي بودجې څخه جوړیږي.

پروان پوهنتون چې له رامنځته کیدو یې نږدې دوه کال تیریږي اوسمهال اته پوهنځي او ۱۳۴ تنه استادان لري، چې شاوخوا ۶۵۰۰ محصلان پکې په زده کړو بوخت دي.

 

خبرونه

اعلانونه